Nakairekord ti Pilipinas ti streptococcal toxic shock syndrome (STSS), makapapatay a sakit wenno kita ti impeksion a ngumatngato iti agdama sadiay Japan.
Daytoy ti kinunna ti infectious diseases expert a ni Dr. Rontgene Solante ita nga aldaw.
Sigun kenni Solante, ti streptococcal toxic shock syndrome (STSS) ket gapu iti gagangay a bakteria a nagtaud iti pharyngitis wenno lumteg ti pharynx.
Inlalawagna a ti bakteria ket posible nga agresulta iti nakaro a komplikasion apaman a maiwaras iti “bloodstream.”
Maibasar iti datos a dinakamat ni Solante, 30% ti mortality rate iti nasao a sakit, kayatna a sawen a mabalin a matay ti naapektaran nga indibidual iti las-od laeng ti baente kwatro oras apaman a rumuar ti sintomas daytoy.
Karaman kadagiti sintomas daytoy ket ti panaggurigor, panagsakit ti bagi,panagrikna iti kinakapuy, panagsarua, ken panagngisit ti sugat.
Kadawyan a maapektaran ti sakit ket ti nakapuy ti immune system-na pakairamanan dagiti natataengan ken kasta met dagiti addaan ti “diabetes” ken chronic renal failure.
Idiay Japan, ngimmato ti kaso iti nasao a sakit ti 900 agingga 1,000.
Gapu iti dayta, binallagaanna ti publiko nga agsuot ti face masks ken buguan ti sugat ken dagos nga agturong iti doktor wenno pag-agasan apaman a mapasaran ti sintomas daytoy.
