Saanen a kondenaren ti Opisina ti Presidente dagiti sasao ni vice President Sara Duterte bayat ti press briefing-na idi laeng agsapa.
Sigun kenni Presidential Communications Office Secretary Cesar Chavez, saan nga agipaulog ti Palasio iti statement mainaig iti atake ni Vice President Sara Duterte.
Maipalagip a natadem unay dagiti balikas nga inruar ni VP Sara idi immuna nga sitdown interviewna kontra kenni President Bongbong Marcos Jr., ken ti lideratona iti pagilian.
Karaman ditoy ti panangiladawanna iti nakatugaw a Presidente a kas ignorante, ken “road to hell” iti agdama ti pagilian.
Imbinglay pay ti Bise Presidente iti pressonna a binutbutengna ni Senador Imee Marcos daytoy iti group chat-da a no saan a sumardeng ti kampona ket kalienna ti bangkay ni Ferdinand Marcos Sr. iti tanem dagiti bannuar ken ibelleng iti West Philippine Sea.
Simmungbat pay ti Bise Presidente iti “deception” nga imbaga ti Presidente, kalpasan a napagsaludsodan iti maysa nga intervies idiay Lao no ania ti riknana iti panagibaga ni Sara a saanda nga aggayyem.
Malagip a nawaswas ti uniteam tandem da Presidente Marcos ken VP Sara, kalpasan a nagikkat ti Bise Presidente iti gabinete idi Hunio.
