Nakasaganan ti Atok Municipal Police Station para iti isasangbay ti adu a turista ita a Yuletide season idiay Atok, Benguet.
Iti panakiuman ti Bombo Radyo kenni Police Captain Arnel Abellera, Acting Chief of Police ti Atok Municipal Police Station, mangipatungpalda iti panag-patrolya ken deployment kadagiti kameng ti pulisya kadagiti nagduduma a tourist sites iti nasao a munsipyo.
Innayonna a nangipuwestodan iti Police Assistance Desk tapno adda ti mangasistar kadagiti turista a sumangbay sadiay.
Ti Police Assistance Desk ket masarakan iti Tourism Assistance Center kasta metten iti Tourist Information Center nga asideg iti Halsema highway.
Malaksid iti dayta, inyunay-unay ni Police Captain Abellera a rumbeng nga agturong dagiti amin a turista, lokal man wenno ganganaet kadagiti pagparehistroan iti Atok Municipal gymnasium tapnu agbayad dagitoy iti environmental fee sakbay dagitoy nga agpasyar kadagiti tourist spots iti Atok.
Kabayatanna, impanamnama ni PCapt.Abellera ti nainget a koordinasyonda kadagiti force multiplier kas iti tanods wenno Barangay Peace Keeping Action Team ( BPAT) iti nagduduma a barangay sadiay.
Innayonna a maysa kadagiti kangrunaan a katulunganda para iti panangpatalinaed iti linak ken kappia partikular iti isasangbay ti adu a turista sadiay Atok dagiti force multipliers partikular iti Barangay Paoay ken iti Caliking.
Pinagyamananna met dagiti sumagmamano nga empleyado kadagiti nagduduma a tourist attractions gaputa dagitoy metlaeng ti tumultulong iti panakaimanehar iti gunay iti trapiko.//Bombo Genzel Depayso
