Nangipatungpal da Ato Sipa-at ken Ato Lao-ingan manipud Chakalan, Bontoc Ili, ti “Manerwap,” maysa a rain-calling ritual dagiti umili idiay Bontoc, Mt Province iti panawen ti tikag tapno makiddaw ti panagtudo.
Daytoy ket kagiddan ti agtultuloy a pannakauram dagiti bambantay idiay Bontoc, Mt Province.
Maibasar iti kaudian a datus ti Bureau of Fire Protection (BFP) – Bontoc, nakailistada ti dua pulo ket siyam a kaso ti forest fire iti nasao a munisipyo.
Gapu iti daytoy, kinasarita ni Bontoc Mayor Jerome “Chagsen” Tudlong Jr., dagiti natataengan ken barangay officials idiay Bontoc Ili itay nabiit para iti pannakaipatungpal ti nasao a ritwal.
Paset ti ritwal a “Manerwap” ti panangdanun kadagiti sagrado a bantay, panagkararag kenni Lumawig, panangidaton ti arak ken tabako kadagiti ancestors ken panagtukar ti gangsa.
Isimsimbolo ti nasao a ritwal ti pigsa, panagkaykaysa ken nauneg a koneksyon kadagiti ancestors ken iti aglawlaw.
Ipakpakitana ti kinapigsa ti maysa a komunidad ken ti pammatida iti pigsa ti ispirito a mang-impluwensiya iti aglawlaw para iti pagsayaatan ti komunidad.//VIA Municipality of Bontoc
