BAGUIO CITY – Sumango iti administrative proceedings ti maysa a mannursuro sadiay Camarines Norte a maatap a nang-bully iti Grade 5 student kabayatan ti umuna nga aldaw ti face to face classes.
Sigun kenni DepEd spokesperson Michael Poa, saan a kankanunungan ti ahensiya ti aniaman a kita ti panagabuso.
Immunan a nag-viral iti social media ti maatap a panangisawang ti mannursuro iti saan a nasayaat a sasao kontra iti 10-anyos nga estudyante kabayatan ti klase.
Dinakamat ni Poa a nakasarita metten dagiti opisyales ti school division office dagiti nagannak ti biktima idi kalman.
Maibasar iti Facebook post ni Jeannie Vargas, kabagyan ti biktima, nagawid ti biktima nga agsangsangit ken insurat na iti papel dagiti maatap nga insawang kenkuana ti mannursuro kas ti “bobo,” “hayop,” ken bruha ka.”
Sigun kenni Vargas, na-trauma ti biktima gapu iti insidente ken saanen a sinumrek iti pagadalan gaputa mabuteng iti teacher.
Impaganetget met ti DepEd a naipaayanen iti psychological first aid ti nasao nga estudyante.
Nabilin metten ti school head ti nasao a pagadalan a mangisubmiter ti incident report ken Child Protection Policy Intake Sheet iti regional director iti uneg ti 72 nga oras sipud napasamak ti insidente.
