BAGUIO CITY – Simmuko iti tropa ti gobyerno ti maysa a mapapati a nangato nga opisyal ti Ilocos-Cordillera Regional Committee (ICRC) ti Communist Party of the Philippines-New People’s Army (CPP-NPA) sadiay Kin-way, Besao, Mountain Province.
Personal nga imparang iti media ni National Security Adviser ken National Task Force to End Local Communist Armed Conflict (NTF-ELCAC) Vice Chairman Hermogenes Esperon Jr. ti nasao nga indibidual a ni Anne Margarette “Annie” Tauli, 70-anyos, mapapati a chairman ti ICRC Finance Committee, sigud a secretary ti ICRC-Regional White Area Committee, miembro ti ICRC Executive Committee ken asawa daydi Julius Soriano Giron nga overall chairman ken National Military Commission chair ti CPP-NPA.
Maipalagip a napapatay iti operasyon dagiti pulis ken militar ni Giron ken dua a kadwana a kameng ti NPA idi March 13, 2020 ditoy siudad ti Baguio.
Kinuna ni Esperon a sinukon ti military helicopter ni Tauli sadiay Besao, Mountain Province ken sitatallugod a nakitugot daytoy kadagiti nangsukon a pulis ken militar para iti panagbiyaheda paturong iti Baguio City.
Maikaniwas daytoy iti alegasyon dagiti militante a grupo nga inlugan laengen ti military helicopter ni Tauli.
Iti isasango ni Tauli iti media, kinunana a simmuko daytoy tapnu dalusan ti naganna manipud kadagiti maibagbaga a koneksiyonna iti komunista a grupo.
Impettengna a maysa daytoy a ‘law abiding citizen’ sadiay Besao.
Kinuna met ni Esperon nga iti pammalawag ni Tauli ket nagserbi daytoy a provider ti taraon ken pagdagusan kadagiti nangangato nga opisyal ti CPPA-NPA-NDF, pakairamanan ni Giron.
Inlawlawag pay ni Esperon a dagiti nasao nga inaramid ni Tauli para kadagiti kalaban ti gobyerno ket katukad ti panaglabsingna iti linteg ti Pilipinas.
Innayonna a ti balligi a panagsuko ni Tauli ket indauluan ti kabsat daytoy a ni sigud nga UN Special Rapporteur on the Rights of Indigenous Peoples Victoria Tauli-Corpuz.
Manamnama nga agnumar ni Tauli iti Enhanced Comprehensive Local Integration Program.
