Impanamnama ni Daryll Kim Longid, dadaulo ti Public Order and Safety Divsion nga amin dagiti agdama ken lehitimo a vendors ket maakomodar iti matartarigagayan a market modernization iti Baguio City.
Daytoy ket kasaruno dagiti naipadamag a panagdanag dagiti vendors gapu ta patienda a ti maibangon a baro a merkado iti siudad ket agbalin a pribado.
Inlawlawag ni Longid nga adda ti masurot a sharing iti partnership iti lokal a gobyerno iti siudad ken dagiti private entities babaen iti Public Private Partnership nu sadino, 25% ti maipaay nga espasyo kadagiti private partners bayat a 75% met ti maipaay para iti public market nga imanihar metlaeng ti siudad.
Inyunay-unay ni Longid a saan a maibilang a privatization ti market modernization gapu ta maipatungpal dagiti pagannurutan ti lokal a gobyerno.
Mainaig iti dayta, dinakamat ni Longid a dagiti nagpilian ti city council kas wagas iti panakapondo ti mapangpanggep a merkado ket ti equity financing, bank loan ken ti Public Private Partnership nu sadino, ti napagnunummoan dagiti maseknan ket ti Public Private Partnership.
Sigun kenni Longid, adu dagiti baro a features a mainayon babaen iti market modernization kas iti nasaysayaat a ventilation, nalawlawa a pagnaan, ti panakaadda dagiti restrooms ken washing areas, ti parking space a mabalin a makaakomodar iti 1200 a lugan, kasta met ti implimentasyon iti sewage treatment plan.
Kabayatanna,dumanon iti agarup uppat a tawen ti mapatta-patta a kabayag tapno maaramid ti market modernization nu daytoy ket marugian.//Bombo Mera Pacpacan
