Pimmusay ti maysa a masikog kalpasan a nagaburan iti nargaay a daga sadiay Sitio Lower Lip-atan, Guinaoang, Mankayan, Benguet bayat ti panagbayakabak ti tudo idi laeng kalman.
Iti panakiuman ti Bombo Radyo kenni Police Corporal Don Max Takayen iti Mankayan Municipal Police Station, naammuan a daytoy ket 8 months a masikog kasta metten nga agtawen laeng daytoy iti 18 a tubo manipud Topdak, Atok, Benguet.
Maibasar iti report, napasamak ti insidente iti 4:50 iti malem idi September 3, 2025 bayat a nakaturog ti biktima iti uneg ti pagtaengan dagitoy idi narba ti riprap wall iti likudan ti pagtaenganda a nangitunda iti panakagabur ti biktima.
Balligi a naretrieved ti bagi ti biktima babaen iti panagtitinulong dagiti personnel manipud iti Mankayan Municipal Police Station, Bureau of Fire Protection (BFP), Guinaoang Barangay Disaster Risk Reduction and Management Committee ken dagiti dadduma a volunteers.
Gapu iti dayta, dagus a naiturong daytoy iti Lutheran Hospital sadiay Abatan, Buguias ngem indeklara ti attending physician daytoy a pimmusay.
