BAGUIO CITY- Saan a ninamnama ni Mayor Benjamin Magalong a maysa isuna kadagiti nadutokan a kameng iti 5-man committee a mangbukel a mangimbestigar wenno mangi-screen kadagiti Courtesy Resignations a naisubmitir manipud kadagiti polis nga addaan iti ranggo manipud Koronel agingga iti Heneral.
Iti pannakiuman ni Bombo Radyo Baguio kenni Mayor Magalong, pinasingkedanna a nakaawat ti awag manipud kenni Secreatary of the Interior and Local Government Benjamin Benjamin Benhur Abalos Jr. innayonna a naikkan daytoy ti advance notice dua nga aldaw ti napalabas mainaig iti nasao nga offer kenkuana, manipud iti duapulo ket dua a kandidato para iti posisyon.
Nupay kasta, nakasagana ni Mayor Benjamin Magalong a nang-awat iti nasao a posisyon nangruna ta kwalipikado daytoy iti nasao a posisyon.
Kabayatanna, maadaan met ti elimition process kadagiti resignation a naisubmitir .
Iti laksid daytoy, pinaregta ni Mayor Magalong dagiti polis a surotenda ti direktiba gapu ta saanda a kasapulan ti agbuteng no awan ti dakes nga ar-aramidenda wenno no nasayaat ti serbisyoda.
Dinakamatna, a nasayaat daytoy a gundaway para kadakuada a mangikkat iti amin a panagduadua ken mangikkat iti naganda nangruna isuda ti sumaruno a lider ti Philippine National Police.
Innayonna, a dagiti opisyal a nagsubmitir ti courtesy resignation ket makapagtrabaho pay agingga awaten ti committee dagitoy.
Kabayatanna, inawagan ni Mayor Magalong dagiti nangato nga opisial nga agtalek iti liderato ti PNP, ti organisasyon, SILG, ken ti presidente tapno mas mapasayat pay ti imahe dagiti pulis.
