BAGUIO CITY – Tinakderan ni Baguio City mayor Benjamin Magalong ti immunan a waragawagna nga awan ti lockdown iti Baguio City iti baet nga imbilinna ti panakaitantan dagiti dadakkel nga aktibidad iti Panagbenga 2020 a maka-awis iti adu a tattao.
Kasaruno daytoy ti paset ti nairuar a waragawag ni Secretary of National Defense Delfin Lorenzana seknan iti panagsuportarna iti desisyon ti Philippine Military Academy a temporaryo a panakairikep ti akademya kadagiti turista gapu iti isyu ti nCoV.
Nailanad iti waragawagna a maitunos daytoy iti desisyon ni City Mayor Benjamin Magalong a nangipataw iti mandatory a city-wide lockdown para kadagiti turista ken bisita.
Iti met personal a mensahe nga impatulod ni Mayor Magalong iti Bombo Radyo, kinunana a taktakderanna ti immunan a waragawagna a saan a maipasidong ti City of Pines iti lockdown.
Inyulitna a mabalin ken nawaya a sumarungkar ditoy siudad dagiti turista ken sangaili.
Linawlawaganna manen a dagiti maitantan laeng ket dagiti government-sponsored events a manamnama a dar-ayan ti adu a tattao.
Immunan a kinuna ni Mayor Magalong a paset daytoy ti proactive control measures tapnu malapdan ti risgo ti nCoV ken maipasigurado a natalged latta ti Baguio manipud iti pangta ti nCoV.
