Agtaltalinaed a maysa kadagiti sangagasut dua pulo a barangay iti siudad ti Baguio ti mabigbig kas “livable.”
Daytoy ket maibasar iti panagadal maipapan iti “livability” nga insayangkat ti City Planning Development and Sustainability Office.
Malaksid iti dayta, nabigbig pay ti dua a barangay nga addaan iti “declining status” bayat a dagiti dadduma ket “moderately livable.”
Sigun kenni Baguio City Mayor Benjamin Magalong, nakabasar iti naaramid a “barangay livability index study” kadua ti barangay digital twin project nu sadinno naibatay daytoy iti audit ken mapping dagiti agdama nga estruktura ken natural covers.
Panggep ti panagadal a maamuan ti agdama nga status dagiti barangay ken agserbi kas giya ti city government a mangikeddeng iti panagdur-as ti siudad nga agturong iti panagbalin a livable, inclusive, creative, sustainable ken resilient.
Bayat iti naangay a panagtaripnong itay nabiit, naiparangarang a ti Barangay South Drive ti nabigbig kas “livable community” bayat a ti Barangay Lower Dagsian ken San Antonio Village ti nabigbig kas “declining livability.
Dumanon met iti uppat a pulo ket maysa ti “moderately livable” ken ti nabatbati a walo pulo ket uppat ket “minimum livability compliance.”
Karaman kadagiti “indicators” a nausar iti panagadal ket pakairamanan ti health centers, pagtaudan ti taraon, kinatalged ken seguridad, pannakagun-od, panaggunay, kaadda dagiti nasken a panagtagilako ken serbisio, espasio ti komunidad, suplay ti nadalus a danum ken nasayaat a panagturay.
Ti livability index ket paset ti Comprehensive Land Use Development Plan 2024-2032 ti Baguio City a naaprobaran itay nabiit babaen ti City Development Council.
Maisubmitir daytoy para iti panagaprobar ti Regional Land Use Committee ken ti Baguio City council.
