Nangipila iti ethics complaint ti maysa a grupo kontra kenni Senator-Judge Pia Cayetano iti maatap a panangipablaakna iti maysa nga spliced wenno na-edit a video kabayatan iti panagserbina kas senator-judge iti impeachment trial ni VP Sara Duterte.
Kinidaw dagiti complainant kenni Ethics Committee Chair Senator Vicente “Tito” Sotto III, dadaulo ti Senate Committee on Ethics and Privileges nga imbestigaranda ni Cayetano seknan iti nasao a social media post.
Sigun iti nasao a grupo, nangipaay iti saan a nasayaat nga impresyon ti impablaak a video ti senadora no sadino kasla ak-aklonen ni House prosecutor ken Akbayan Rep. Chel Diokno a naipila ti impeachment case kontra iti bise presidente uray nu awan ti konkreto nga ebidensya dagitoy.
Patien ti nasao a grupo a ti maatap a panangiwaras ti senadora iti bidut nga impormasyon ket mabalin a makadadael iti integridad ti trial ken iti talek ti publiko iti senado kas impeachment court.
Immuna metteng nga inlawlawag ni Representative Diokno a ti konteksto ti statement daytoy ket mapasamak laeng “fishing expedition” nu mangbibiruk ti maysa a benneg iti ebidensya nga awanan basaran.
Iti agdama, awan pay laeng ti statement manipud kenni Sen. Pia seknan iti nasao nga isyu. //bombokaren.c.sapirao
