Nakemmeg iti maikatlo a gundaway ti maysa a lalaki a.k.a “TJ”, agtawen iti 26, ken maysa a High Value Individual (HVI) sigun iti Philippine National Police database ken Regional Target listed ti PDEA-Cordillera, babaen iti drug buy-bust operation nga impatungpal ti Philippine National Police (PNP) Drug Enforcement Group Special Operations Unit ti rehiyon Cordillera idiay Purok 15, Balboa, Irisan, Baguio city iti rabii, idi kalman.
Ti suspek ket agdama a residente ti Barangay Dreamland, La Trinidad, Benguet.
Nasamsam manipud kenkuana ti dua a piraso ti heat sealed transparent plastic sachet a naglaon iti maatap a shabu (subject for sale) nga addaan iti timbang nga agarup 10 gramo ken adddaan iti Standard Drug Price a dumanon iti P68,000.00
Bayat iti panangkapkap ti maysa nga operatiba iti suspek, naalan ti maysa pay a piraso ti knot tied transparent bag a naglaon iti maatap a shabu nga addaan iti timbang a 50 grams ken Standard Drug Price a dumanon iti P340,000.00.
Malaksid iti dayta, nakumpisak manipud iti suspek ti maysa a piraso ti genuine 500 peso bill a naaramat kas buy-bust money, 55 a piraso ti peke a 500 peso bill a naaramat kas boodle money, maysa a selpon, susi ti motor, weighing scale, plastic sachet a naglaon ti aluminon a kartib, nagduduma a gatad ti kuwarta, sumagmamano nga empty plastic sachet, motor, ken ti helmet daytoy.
Balligi ti nasao nga operasyon babaen iti PNP DEG SOUCAR (leas unit) kaduada ti Baguio City Police Office Station 9, City Drug Enforcement Unit ti Baguio City, Philippine Drug Enforcement Agency-Cordillera Administrative Region Baguio-Benguet, Regional Police Drig Enforcement Unit Police-Regional Office Cordillera Administrative Region, Regional Intelligence Unit 14, ken Philippine Drug Enforcement Agency Land Transportation Interdiction Unit.
Naiturong met ti suspek kasta metlaeng dagiti nakumpiska a drug ken non-drug items iti opisina ti PNP DEG-SOUCAR idiay Camp Major Bado, Dangwa, La Trinidad, Benguet para iti umno a dokumentasyon ken disposisyon.
Kalpasanna, naiturong dagiti drug evidence iti Regional Forensic Unit idiay Camp Major Bado Dangwa, La Trinidad, Benguet para iti qualitative examination.
Sumango met ti suspek iti kaso a pananglabsing iti Republic Act 9165 wenno Comprehensive Dangerous Drugs Act of 2002. // via Bombo Noveh Organo
