BAGUIO CITY – Nadangran ti maysa a babai kalpasan a natinagan iti bato ti nagluganan da a passenger jeepney iti Makutiti Road Section sadiay Mt Province idi rabii.
Ti nasao a passenger jeepney ket addaan iti sangapulo ket tallo a pasahero manipud Bontoc ken paturong sadiay Sadanga idi napasamak ti insidente.
Iti interview ti Bombo Radyo Baguio, kinuna ni Neil Culallad, PDRRMO ti Mt. Province, nakaro a nadunor ti pasahero a nakatugaw iti front seat.
Nabigbig daytoy a ni Shirley Guinoban, 42-anyos ken residente ti Poblacion, Sadanga.
Natalged met ita ti kasasaad ti driver a ni Rogel Peningeo, 39-anyos ken dagiti daduma pay a pasaherona.
Sigun kenni Culallad, narigatan dagiti response team a nangitaray iti biktima iti Bontoc General Hospital gapu iti panagreggaay ti daga ken batbato nu sadino narisgo a madalyasat ti kalsada.
Immunan a nagturong dagiti personnel ti Municipal Health Office iti nakapasamakan ti insidente tapno mangipaay ti first aid.
Imbalakad met ni Culallad ti saan pay a panagbiahe sadiay Mt Province tapno mailiklik iti aniaman nga insidente.
