Pimmusay ti maysa a senior citizen kalpasan a binugbog ken binalkot ti manugangna ti ulo daytoy idiay Cavite.
Sigun kenni Police Lieutenant Colonel Orlando Carag, chief of police ti Trece Martires City Police Station, ti anak ti biktima ti nakakita iti napasamak iti inana.
Malaksid iti dayta, naduktalan pay a naigalut dagiti ima ti nasao a biktima.
Maibasar iti medico-legal, nagsagrap ti biktima iti blunt force trauma iti tengnged daytoy nga isu ti kangrunaan a rason iti ipupusayna.
Sigun kadagiti pulis, nag-apa dagiti agkatugangan gapu ta maatap nga insalda ti suspek ti laptop ti anakna nga apo ti biktima.
Malaksid iti daytoy, kinuna pay dagiti awtoridad a siguden nga adda ti tension iti nagbaetan ti suspek ken ti biktima gapu ta mapapati a tinakaw ti suspek ti alahas ti biktima nga aggatad iti P300,000.
Naitabonen ti bangkay ti biktima bayat a maan-anop ti suspek.
Kidkiddawen met ita dagiti kabagian ti biktima ti napartak a pannakatiliw ti suspek tapnu magun-odda ti hustisia.
