BAGUIO CITY – Nabigbigen ti maysa pay kadagiti walo a bangkay a nasarakan iti deppaar ti Marcos Highway sadiay Poyopoy, Taloy Sur, Tuba, Benguet.
Iti panakiyuman ti Bombo Radyo kenni PMaj James Acod, hepe ti Tuba Municipal Police Station, kinunana a maysa kadagiti bangkay ti positibo a binigbig ti kapamilya daytoy.
Sigun kenkuana, nagpada ti ladawan ken tattoo nga impakita ti pamilya iti nasao a bangkay.
Dinakamatna a ti nasao a bangkay ket 30-anyos, tubo ti Tadian, Mountain Province ken dua a bulan ti napalabas a pimmusay daytoy.
Nupay kasta, nagkedked ti pamilya nga iwaragawag ti nagan ti nasao a bangkay.
Maipasidong ti bangkay iti dokumentasyon sakbay a maipaima iti pamilyana.
Agtaltalinaed met ti lima pay a bangkay a saan a nabigbig iti maysa a punerarya sadiay Marcos Highway.
Maipalagip a ti dua kadagiti bangkay ket nabigbigen a da Kent Charlie Licyayo, 22-anyos, tubo ti Hingyon, Ifugao ken residente ti Hilltop, Baguio City ken Fahad Manan Macalanggan, 28-anyos, maysa a Maranao ken residente ti Crystal Cave, Baguio City.
Umap-apela met ni PMaj Acod kadagiti mapukpukawan iti kapamilya wenno kabagian tapnu agturongda laeng iti nasao a punerarya para iti kumpirmasyon.
