Naituding nga agtaripnong dagiti miembro iti North Atlantic Treaty Organization (NATO) inton Martes tapno talantanen ti panaglabsing iti Russia iti Estonian airspace.
Daytoy ket kalpasan a simrek ti tallo a Russian MiG-31 fighter jets iti masakupan iti Estonian airspace iti laksid iti umno a pammalubos.
Sigun iti report, bimmayag ti panagtalinaed dagiti Russian fighter jets iti las-ud iti 12 a minutos sakbay a napapanaw dagitoy.
Gapu iti dayta, nagkiddaw ti Estonia iti konsultasyon kalpasan ti inladawanna nga “unprecedentedly brazen” incursion.
Maibasar iti Article 4 iti nasao a treaty, kasapulan dagiti miembro iti NATO a maaddaan iti konsultasyon kadagiti gundaway a patienda nga addaan iti maawat a pangta iti siasinoman kadagitoy mainaig iti teritoryo, political independence, ken security.
Pinaglibakan met ti Russia ti nasao nga akusasyon.
