Panggep ni South Korean President Yoon Suk Yeol a mangparnuay ti baro a ministry a mangtaming ti nababa a birthrate ti pagilia, nu sadinno, kababaan dagitoy iti intero a lubong.
Kiniddaw iti nasao a presidente ti kooperasion ti parliamento a marebisar ti organisasion ti gobierno tapno mabukel ti Ministry of Low Birth Rate Counter Planning.
Maibasar iti rekord ti nasao a pagilian, nababa ti “birth rate” sadiay idi napalabas a tawen iti laksid ti panangipaayda ti binilbilyon a dolyar a panagregget a mangparegta kadagiti babbai a maaddaan iti ad-adu nga annak ken tapno mamintinir ti kinatalged ti populasion.
Ti nasao a pagilian ket maysa kadagiti addaan ti “longest life expectancies” wenno kinapaut ti panagbiag ken kababan a bilang dagiti maipasngay iti sangalubungan.
Bimmaba ti fertility rate ti South Korea iti 0.72 idi tawen 2023, pito a porsiento ti bimmabaanna manipod 2022 kas maibasar iti datos ti Statistics Korea idi laeng bulan ti Pebrero.
Iti nasao a datos, addayo a nababbaba ngem iti 2.1 nga ubbing a kasapulan tapno mataginayon ti agdama a populasion a 51 milion nu sadinno , posible a dandani a kagudua inton dumteng ti tawen 2100.
Kabayatanna, karaman kadagiti programa ti nasao a gobierno a maipatpatungpal tapno ad-adu ti mabukel a maladaga ket ti “cash subsidies”, “babysitting services”, ken suporta para iti “infertility treatment.”
