BAGUIO CITY – Sumangsango ita iti kaso a parricide ti maysa a mister kalpasan ti maatap a panangpaltogna iti asawana a nagresulta iti ipupusay daytoy sadiay Malamsit, Peñarrubia, Abra idi kanikadua.
Nabigbig ti suspek a ni Josemar Valera, 29-anyos bayat a nabigbig ti biktima a ni Jenica Valera, 23-anyos.
Sigun kenni PCapt. Joseph Dumaya, hepe ti Peñarrubia Municipal Police Station, posible a nagsinnungbat ti agasawa a nagresulta iti panangpaltog ti mister iti misis daytoy.
Kinunana nga iti panagrespondeda iti balay ti agasawa ket nasangpetanda a nagkaiwara dagiti kagawaan iti uneg ti balay bayat a narekoberda ti maysa a caliber 38 agarup 10 a metro manipud iti balay ti agasawa.
Naamuan a dead on arrival iti pagagasan ti biktima gapu iti nasagrap daytoy a maysa a tama ti bala ti paltog iti kanigid a barukong.
Sigun met iti mister a suspek, saanna a pinaltogan ti asawana gaputa kalpasan nga insimpana ti paltogna ket inyawatna daytoy iti asawana tapnu maidulin ngem kalpasan ti sumagmamano a minutos ket nakangngeg iti putok ti paltog ken nakitana laengen ti asawana a dara-dara.
Kabayatanna, kinuna ni PCapt. Dumaya nga uray saan nga agipila iti kaso dagiti kabagian ti biktima ket ituloy latta ti pulisya ti Peñarrubia ti kaso ken dagitoy ti agserbi a complainant.
