BAGUIO CITY – Indeklaran dagiti otoridad a natalgeden ti munisipyo ti Bauko, Mountain Province kalpasan ti rinnupak iti nagbaetan ti tropa ti gobyerno ken dagiti rebelde a New People’s Army (NPA) idi napalabas a bulan ti Abril.
Iti panakiyuman ti Bombo Radyo kenni Police Captain Joshua Mateo, hepe ti Bauko Municipal Police Station, kinunana a nalpasen ti mopping-up operation ti militar ken pulisya kadagiti kabambantayan ti Barangay Bagnen.
Innayonna a nadalusanen ti pagtataudan ti danum dagiti umili kalpasan a maatap a nasabidongan gapu kadagiti rugit nga imbati dagiti rebelde a nagkampo iti asideg dagiti water sources.
Dinakamatna a daytoy ti kaunaan a gundaway a napasaran dagiti umili ti Bauko ti rinnupak a nagresulta iti panaka-trauma ken panagbuteng dagiti umili.
Nangipasa metten dagiti barangay ti Bauko kas iti Tatapan, Lagawa, Nabaay, ken Sagsagan iti resolusyon mangkonkondinar ken mangipawpawil iti presensia dagiti rebelde iti lugarda. (-Bombo Maureen Bassit / Bombo Charles Nikko Limon)
