Nagpalagip ni PMaj. Marcy Grace Marron, Public Information Officer ti Baguio City Police Office kadagiti motorista kasta metlaeng kadagiti turista nga adda ken agpasyar iti siudad ti Baguio.
Daytoy ket kagiddan ti napasamak nga insidente ti “basag kotse” iti central business district partikular iti asideg ti Baguio City Hall itay kanikadua.
Sigun kenni PMaj. Marron, addan ti person of interest dagitoy iti nasao nga insidente.
Iti inisyal nga imbestigasyon ti kapulisan, nagparada ti driver ti lugan iti baba ti City Hall tapno mangan dagitoy.
Nupay kasta, idi nagsubli daytoy iti nagparadaanna pasado 9:00 iti rabii ket nakitana a nabettak ti sarming ti maysa kadagiti ruangan ti lugan.
Malaksid iti dayta, ket natakaw pay ti DSLR camera daytoy.
Kabayatanna, nagpalagip ti nasao nga opisyal a nasaysayaat ti agparada kadagiti nalawag nga area, agparada kadagiti addaan iti CCTV ken no mabalbalin kargaan iti alarm ken dadduma pay.
Malaksid iti dayta, liklikan metlaeng ti agparada kadagiti saan a naituding a pagparkingan.
Daytoy metlaeng ti kaunaan a basag kotse a naireport kadakuada ita a yuletide season.
Impettengna pay kadagiti turista a nasken a sumurotda kadagiti pagalagadan iti siudad ti Baguio nangruna kadagiti traffic laws/ rules kas iti King of the Road Ordinance, Coding ken dadduma pay.
Kagiddan dayta, nagkiddaw metlaeng daytoy iti publiko a saan dagitoy a dagus a mamati kadagiti unverified information.
Daytoy ket kalpasan metlaeng nga adda ti post iti social media nga adda ti CCTV ngem naka-off daytoy rason a saan a mabigbig dagiti pulis ti nangaramid iti nasao nga insidente.
Inlawlawagna pay nga addaan iti kustodiya ti pulisya nangruna ti imbestigador ti kopya ti CCTV ken addan ti person of interest dagitoy.//Bombo Noveh Organo
