Naibabawi itan ti naituding a maximum suggested retail price (MSRP) kadagiti karne iti baboy.
Sigun kenni Agriculture Secretary Francisco Tiu Laurel Jr., ti nasao a tignay ket gapu iti kiddaw dagiti industry players.
Inlawlawagna a nupay nagtulnog met dagiti adda iti nasao nga industriya iti naituding nga MSRP,nagbalin a narigat ti panakaibaba iti presyo dagiti karne iti baboy kadagiti merkado gapu iti kinakurang iti suplay ken ti nangato a demand.
Maipalagip a daduma kadagiti lugar iti pagilian ket naapektaran iti panagraira iti African Swine Fever a nakaapektar iti produksyon iti karne iti baboy.
Iti baet dayta, impanamnama ti agriculture secretary a mangisagsagana itan ti Department of Agriculture iti ad-adda nga epektibo a solusyon tapno maibaba ti presyo dagiti karne.
Kagiddan dayta, pinalagipanna dagiti konsyumer nga aggatang kadagiti sabali pay a produkto a mabalin a pagtaudan iti protina wenno dagiti frozen pork.
