BAGUIO CITY – Indeklara ti lokal a gobyerno ti munisipyo ti Lamut sadiay probinsia ti Ifugao ti ‘state of calamity’ gapu iti dengue.
Kasaruno daytoy ti ipupusay ti dua nga indibidual gapu iti dengue fever ken iti panakailista ti kaso ti dengue iti amin nga 18 a barangay ti munisipyo.
Naibasar metlaeng ti resolusyon nga impasa ti Sangguniang Bayan iti rekomendasyon ti Lamut Municipal Health Office ken iti kiddaw ti mayor ti munisipyo.
Nailanad iti resolusyon a makapa-alarma ti nasao a datus nga agserserbi a napateg nga ebidensya nga adda ti dengue outbreak sadiay Lamut.
Sagudayen ti linteg a no maideklara ti ‘state of calamity’ ket mabalin nga aramaten ti maseknan a lokal a gobyerno ti calamity fund para iti panakapondo dagiti programa ken aksion tapnu malabanan ti panagngato ti kaso ti dengue.
Maibasar iti kaudian a datus ti DOH-Cordillera, dumanon iti siyam nga indibidual ti pimmusay gapu iti dengue ditoy rehiyon manipud Enero agingga Agosto ita a tawen ken manipud iti nasurok 4,700 a kaso ti dengue iti entero a rehiyon ket 478 a kaso ti dengue ti nailista sadiay Ifugao.
