BAGUIO CITY – Agtaltalinaed latta a karit ti nababa ti bilang dagiti mannursuro a nabakunaan kontra iti COVID-19 manipud iti masakupan ti DepEd-Benguet Division kaggidan iti umadani a panaglukat ti school year 2021-2022 inton September 13.
Sigun kenni DepEd-Benguet Schools Division Superintendent Gloria Buya-ao, dumanonen iti nasurok 1,300 dagiti mannursuro a nabakunaan manipud iti nasurok 5,000 a personnel dagitoy.
Kinunana a puntiryada a bakunaan ti 80% kadagiti personnelda ngem iti datus dagitoy ket bassit paylaeng dagiti nabakunaan.
Inaklonna nga adda latta dagiti dadduma a manursuro nga agkedked nga agpabakuna ken adda met dagiti agtarigagay a mabakunaan ngem awan paylaeng ti bakuna a naipaay wennu dagiti daduma ket agur uray paylaeng iti kauna a maiturong kadagiti lugarda.
Inyunay-unayna pay a napateg ti panagpabakuna dagiti manursuro tapnu adda iti proteksion dagitoy kontra iti covid-19 ken kas panagsaganada no maipalubos ti limitado a face-to-face class iti rehiyon Cordillera.
