Posible nga ad-adda a bumaba ti temperatura iti siudad ti Baguio ken dagiti sumagmamano a paset ti rehion Cordillera intun sumaruno a tawen partikular iti Enero ken Pebrero.
Iti pannakiuman ti Bombo Radyo kenni Mar Joseph Santos, Weather Observer ti Philippine Atmospheric, Geophysical, and Astronomical Services Administration-Baguio, kinuna na a posible nga agpaut agingga iti Marso ken Abril intun sumaruno a tawen ti nalam-ek a temperatura iti siudad gapu iti hanging amihan.
Sigun kenni Santos, naudi a narikna ti epekto ti hanging amihan iti rehion, isu’t gapuna a posible nga agpaut angingga iti nasao a bulan.
Maibasar iti obserbasion ti nasao nga ahensia, nangrugi a napasaran ti nalam-ek a panawen iti ngudo ti Nobiembre ngem saan unay a narikna gapu iti agbaliwbaliw a temperatura.
Sigun pay iti nasao nga opisial, agtata-ud iti amianan a daya ti angin ken mangapektar iti amianan ken daya a Luzon, nangruna iti siudad ti Baguio.
Kabayatanna, kinuna ni Santos a maysa a rason no apay a nababa ti temperatura ti siudad ken dagiti dadduma pay a lugar iti rehion ti lokasion dagitoy no sadino, kaaduan a lugar iti rehion Cordillera ket nangangato.
Iti sabali a bangir, posible a sumrek ti bagyo iti pagilian ita a Disiembre, ngem mabalin nga apektaranna laeng ti Visayas ken Mindanao gapu iti panangiduron ti hanging amihan.//mp4
