![](https://img.bomboradyo.com/baguio/2019/11/owwa.png)
BAGUIO CITY – Mairekreklamo ti maatap a nabuntog a panangipaay ti Overseas Workers Welfare Administration (OWWA) – Cordillera iti benepisyo para kadagiti distressed nga OFWs ditoy rehion.
Sigun kenni Nelson Arais, maysa kadagiti distressed OFW a nagtrabaho iti maysa a kompanya sadiay Dubai, saan a tinungpal ti OWWA ti karida a financial assistance para kadagiti distressed OFWs.
Kinunana a namin ado a daras a nagsubli-sublida iti opisina ti OWWA – Cordillera tapno mangiproseso kadagiti kaskenan a dokumento a nangrugi idi pay Hulyo ngem napaay dagitoy a makaaawat iti tulong ti nasao nga opisina.
Sigun kenkuana, inkari ti OWWA nga ipaayda ti benepisyo iti las-od ti dua a bulan ngem agingga ita ket awan pay ti naaw-awatda bayat a dagiti kakadwada a distressed OFWs a nagaplikar iti sabali a rehion ken naawatdan ti benepisyoda.
Innayon ni Arais nga irekrekomendar pay ti OWWA ti panagaplikarda ti ATM account tapno maalada ti benpisyoda.
Naamuan a dumanon iti 20,000 ti maala koma dagiti distressed OFWs babaen iti programa ti nasao nga ahensia.
Padaanan ti sungbat ti OWW-Cordillera iti nasao a reklamo.