BAGUIO CITY – Atiddog unayen ti pila dagiti lugan dagiti mannalon a mangitulod ti nateng iti La Trinidad Vegetable Trading Post ken iti Benguet Agri-Pinoy Trading Center (BAPTC) kasaruno ti naimplementar a dua nga aldaw nga Extreme Enhanced Community Quarantine sadiay La Trinidad, Benguet ken iti panakairikep dagiti pribado a trading areas sadiay.
Iti interview ti Bombo Radyo Baguio kenni Agot Balanoy, panakabagi ti liga dagiti asosasyon iti La Trinidad Vegetable Trading Post, kinunana a parikut ita ti nagulo a pila a dimmanonen sadiay Wangal gaputa awan ti mangiwanwan iti cuing system ken dagiti laeng pulis ken dadduma a disposers ti mangiwanwanwan iti nasao a pila.
Dinakamatna a gapu iti social distancing ket bassit a lugan ti nateng ken tao ti nakastrek iti La Trinidad Vegetable Trading Post ken iti BAPTC isut gapuna a saan met a na-maximize ti espasyo dagitoy.
Inaklonna a gaputa bassit a lugan ti simrek iti La Trinidad Vegetable Trading Post ket inngina dagiti retailers dagiti nateng a nagresulta iti panagreklamo dagiti buyers.
Impetteng pay ni Balanoy a dagiti local restrictictions gapu iti community quarantine ti mangparparigat iti panakailako dagiti nateng sadiay a nagresulta iti saan nga stable presyo dagiti nateng iti La Trinidad Vegetable Trading Post.
Inyunay-unay metlaeng ni Balanoy a no malukatan dagiti pribado a trading centers kas iti backfill area ket adu dagiti makastrek a nateng nga agresulta met tapnu saan unay a nangina ti panagpresyo dagiti retailers iti bagsakan area.
Dinakamatna nga adda ti apelada kenni Mayor Romeo Salda a mailukat ti backfill trading area tapnu makatulong iti panakakissay ti atiddog a pila ti lugan dagiti mannalon.
Sigun kenkuana, nakasagana met dagiti agtagikua kadagiti pribado a trading areas a mangipaay iti tao tapnu maipasigurado ti social distancing ken mangisayangkat ti disinfection.
Inlawlawagna pay a no saan a magatang dagiti nateng ket sigurado manen nga adda ti maibelleng kadagitoy.
Gapu iti daytoy, kinuna ni Balanoy a no adda laeng ti umno nga istratehiya iti panagpila dagiti mannalon a mangitulod ti natengda ken dagiti gumatang a buyers ket saan unay a nakaro ti problema iti trading areas sadiay Benguet iti baet dagiti nainget a pagalagadan gapu iti manarimaan a community quarantine.
