BAGUIO CITY – Irtengan pay ti Baguio City Police Office (BCPO) dagiti programa nga ipatpatungpalda kontra iti panagrames tapno maliklikan ti panagngato ti insidente ti nasao a krimen.
Sigun kenni PLtCol. Judy Jasmin Palicos, dadaulo ti City Community Affairs Development Unit ti BCPO, adu dagiti isaysayangkatda a programa tapno masolusyonan ti ngumatngato a kaso ti panagrames iti lokalidad.
Kinunana a paset daytoy ti panagtungpalda iti pammilin ni Mayor Benjamin Magalong nga irtenganda dagiti agdama a programa ken mangipatungpalda ti baro a programa ken estratehiya tapno masolusyunan ti nasao a pakaseknan.
Imbinglayna nga idi napalabas a lawas ket nangiwarasda ti coordination letters kadagiti nagduduma a pagadalan ti elementarya ken secondarya ditoy siudad para iti isayangkatda a panagsuro mainaig kadagiti nasken nga aramiden ken saan nga aramiden dagiti agtutubo wenno ubbing tapno maliklikan ti panakabiktima dagitoy iti panagrames.
Innayonna a mangisayangkatda metlaeng ti virtual lectures kadagiti estudyante ti Grade 4 agingga iti kolehiyo.
Maibasar iti kaudian a datus ditoy siudad, nailista ti 15 a kaso ti panagrames manipud Enero agingga Mayo ti agdama a tawen.
