BAGUIO CITY – Marikriknan ita dagiti kadete ti Philippine Military Academy (PMA) dagiti reporma a maipatpatungpal sadiay kasaruno ti isyu iti panaka-hazing wenno panakaparparigat daydi Cadet Fourth Class Darwin Dormitorio a nagresulta iti ipupusay daytoy.
Iti panakiyuman ti Bombo Radyo iti panakangiwat ti PMA a ni Capt. Cheryl Tindog, kinunana a daytoy ti nailanad iti resulta ti insayangkatda a panagadal iti epekto dagiti reporma nga ipatpatungpalda sadiay.
Impannakkelna nga ita ket makaturturogen a naimbag dagiti kadete, maka-study wenno makarepason dagitoy a naimbag ken mas maobserbarandan ti proper hygiene.
Innayonna a nabaelanen dagiti kadete a maaddaan iti nasaysayaat a relasyon kadagiti pada dagitoy a kadete ken nailanad pay iti resulta ti panagadal a mas maseknan ita dagiti kadete iti panakagibus ti amin a kita ti panagmaltrato iti uneg ti akademya.
Dinakamat pay ni Capt. Tindog a kanayon ti panangbagbagada kadagiti kadete iti agbalin nga epekto wenno bunga no aglabsing dagitoy kadagiti pagalagadan ti akademya.
Impasiguradona metlaeng ti panagaramid ti administrasyon ti PMA kadagiti pagrebbenganda para iti pagimbagan dagiti kadete sadiay.
