BAGUIO CITY – Agtaltalinaed ti advisory ti lokal a gobyerno ti Bauko, Mt. Province para iti panagannad ken panagridam dagiti umili ken turista sadiay kasaruno ti inawaganda nga insurgency crisis a mangap-apektar ita iti linak ken kappia iti nasao a munisipyo.
Nailanad iti advisory ti temporaryo a panakairikep dagiti amin a tourist sites sadiay Bauko, partikular dagiti masarakan iti asideg dagiti barangay ti Bagnen, Abatan ken Poblacion kas iti Mt. Polis, Cotcot Aso, Nentingli, Mt. Kapuwaw, Spanish Trails, Mt. Am-o, Toktok Allan, Layaan Burial Caves ken Pangayapang Falls.
Gapu iti daytoy, temporaryo a nakanselar dagiti nakapilan a tourism activities sadiay Bauko.
Ibalbalakad ti lokal a gobyerno ti saan pay a panangipatungpal dagiti umili ken turista iti aniaman nga aktibidad mainaig iti turismo ken dadduma pay kas iti panagturong kadagiti pagmulaan nangruna kadagiti kabambantayan.
Naiyapela met ti saan a panagtalinaed dagiti umili kadagiti kalkalsada iti dis-oras nangruna no saan met a kasapulan.
Inyapela ti gobyerno ti panagbalin a nakalma ken naridam dagiti agindeg sadiay Bauko kagiddan ti panagbantayda iti aglawlawda tapnu dagus nga ireportda kadagiti otoridad dagiti makitada a mapagduadua-an nga aktibidad wenno indibidual iti lugar dagitoy.
