BAGUIO CITY – Narekober dagiti kameng ti 50th Infantry Battalion ti Philippine Army ti nagduduma nga Improvised Explosive Device (IED) a maatap a tagikua dagiti kameng ti New Peoples Army (NPA) sadiay Sitio Bunnong, Tanglag, Lubuagan, Kalinga.
Iti panakiuman ti Bombo Radyo Baguio kenni Lt. Col. Gulliver Señires, commanding officer ti 50th IB, kinunana a karaman kadagiti narekobreda nga eksplosibo ti granada, anti-personnel mine, anti-tank mine, rifle grenade ken bala ti M16 ken M14 rifle a naikarga iti maysa a drum a naikali.
Kinunana a nakarekoberda met laeng ti maysa a training manual a nakailanadan no kasano ti agaramid iti bomba ken dagiti nagduduma a dokumento ken papeles.
Patien ni Señires nga imbati dagiti kameng ti NPA dagiti nasao nga eksplosibo gaputa sigud a sadiay Sitio Bunnong ti naglemmengan ti sumagmamano kadagiti nasao a rebelde.
