BAGUIO CITY – Mapappapintas ita dagiti kalkalsada ken waiting shed sadiay Itogon, Benguet gapu kadagiti namaris ken creative a paintings, landscapes ken murals.
Sigun ken ni Mayor Victorio Palangdan, gapu daytoy iti maipatpatungpal a Barangay Beautification Contest a maysa kadagiti aktibidad para iti pannakarambak ti Foundation Anniversary ti Itogon inton December 11, 2020.
Nagyaman ti mayor kadagiti residente gapu iti kooperasion dagitoy para iti pannakapapintas ti munisipioda.
Kinuna pay ni Palangdan a maysa ti aktibidad a wagas tapno maikkat ti buryong dagiti umili gapu iti pandemya ken tapno mariknada ti panawen ti Paskua.
Tema dagiti paintings ken landscapes ti kultura, pammati ken ti ispirito ti panagtitinnulong ita a panawen ti pandemya.
