Agtultuloy ti nainget a checkpoints nga ipatpatungpal ti Baguio City Police Office agsipud ta umadanin ti 2025 National, Local, ken BARMM Elections.
Iti pannakiuman ti Bombo Radyo kenni Baguio City Police Office City Director PCOL. Ruel Tagel, kinunana a 24/7 a mangipatpatungpal dagiti nagduduma nga istasyon iti Baguio City Police Office iti checkpoints iti masakupan ti City of Pines kangrunaan kadagiti boundaries iti siyudad.
Sigun kenni PCoL. Tagel a no kadagiti gundaway nga adda ti maobserbaran dagiti kameng ti pulisya a suspicious wenno mapagduaduaan kadagiti motorista, ket mangipatungpalda iti kanayonan nga inquiry.
Kinunana pay a saan laeng a gun ban ti maipatpatungpal no diket no adda metlaeng dagiti nakita dagiti kameng ti pulisya nga iligal a droga, bladed weapons ken dadduma pay bayat ti visual search nga impatungpal dagitoy kadagiti checkpoints.
Gapu iti dayta, maysa a kangrunaan nga addang ti ipatpatungpal dagiti otoridad ket ti further inquiry agingga ma-justify ti nacapture wenno panangala dagiti kameng ti pulisya kadagiti igam a maalada iti ikit dagiti motorista.//Bombo Gen
