BAGUIO CITY – Naisayangkat ti maysa a nainsigudan a ritwal a naawagan ti ‘changtey’ para iti entero a Mountain Province.
Sigun iti lokal a gobyerno ti nasao nga ili, babaen iti naisayangkat a ritwal ket malabanan ti aniaman a kita ti sakit, peste wenno kalamidad a posible a sumrek iti maysa a pagtaengan wenno komunidad.
Immunan a naisayangkat ti kapada a ritwal iti sumagmamano a munisipyo ken barangay ti Montanyosa tapnu mailiklikda iti didigra nga ituntunda ti COVID-19.
Narugian ti ritwal babaen iti panagparti ti manok a sinaruno ti panaka-adal ti posisyon ti dalem ken apro babaen kenni George Luis Fakat wenno Ama Changat nga Indigenous Peoples Mandatory Representative ti ili ti Bontoc.
Nailuto ti manok kagiddan ti naasinan a karne ken sinaruno daytoy ti panangisab-it iti sangsanga ti mula a ‘tikem’ a kadawyan a maar-aramat iti protection rituals iti sumrekan ti nakaisayangkatan ti ritwal.
Kagiddan ti panakaisab-it ti ‘tikem’ ket kiniddaw ni Ama Chagat kenni Lumawig ti panangsalwad daytoy iti Montanyosa manipud iti saksakit ken peggad ken kadagiti tattao a sumrek ken rumwar iti probinsia.
Kasaruno daytoy, nairekomendar ti panangisayangkat dagiti dadduma a munisipyo ti Mountain Province iti kaskenan a ritwal iti lugarda tapnu maprotektaran dagiti komunidad manipud iti sakit.
Kinuna met ni Mountain Province Governor Bonifacio Lacwasan Jr. a sibibiag latta dagiti nainsigudan a tradisyon sadiay ken nasken a maituloy a maipangag ti sirib dagiti natataengan gaputa dagitoy ti rason iti panagkaykaysa ken panagtalinaed a natibker dagiti komunidad.
