Saan a pabor dagiti sumagmamano a meat vendors iti Baguio City Public Market iti pay parking iti sango ti carinderia building gapu ta malinglingedan ti pwesto dagitoy.
Iti interview ti Bombo Radyo kenni Bong Alvar, maysa kadagiti nainsigudan nga aglaklako ti karne sadiay, awanen ti pangiparadaanda nu agidiskarga dagitoy kadagiti ilakoda a karne gapu ta nakaparada dagiti pribado a luglugan.
Malaksid iti dayta, saan a nalawag kadakuada ti pagannurotan ti lokal a gobyerno seknan iti panagserrek dagiti livestock gapu ta adda ti agsisinnabali a baybayadanda iti arrival, slaughter, ken delivery dagitoy.
Innayon ni Alvar a nupay adda ti maipatpatungpal a public consultation sakbay a maipatungpal dagiti pagannurotan iti siudad ket awan ti maar-aramidanda gapu ta dagiti addaan ti bileg ti masursurot nu sadino maiparikep ti pwesto dagitoy nu saan da nga agtulog.
Mainaig iti dayta, inladawan ni Alvar a “ningas kugon” laeng ti panangipatungpal ti maseknan nga opisina iti monitoring kadagiti frozen meat gapu ta awan ti mangiwanwanawan kadagiti pwesto dagitoy kadagiti ordinary nga al-aldaw.
Imbutaktakna pay nga adu dagiti mishandled meat iti merkado publiko ngem saan a matiltiliw ti panangilusotda kadagitoy.//Bombo Rob Dominguez
