Overwhelming para kadagiti napagasatan a Lucky Summer Visitors ti pannakapilida kas kangrunaan a bisita iti siyudad ti Baguio ken Probinsya ti Benguet ita a Holy Week.
Sigun kenni Jellyn Bautista manipud Pangasinan, nagduadua dagitoy idi damo gapu ta ipagarup dagitoy nga scam ti maidiadiaya kadakuada.
Kinuwestiyonaranna pay ti Baguio Correspondents and Broadcasters Club nu amangan nga adda ti hidden charges kadagiti amin a benepisyo a maipaay kadakuada.
Nupay kasta, naibinglay daytoy a namatida iti kinapudno iti aktibidad ti BCBC kalpasan a nakitada dagiti identification cards wenno pakabigbigan dagiti sumagmamano a journalists.
Impeksa daytoy nga iti umuna nga aldaw ti isasangbayda iti City of Pines ket nariknada ti hospitability dagiti taga Baguio ken Benguet.
Gapu iti dayta, nalaos met ti panagyamanda iti BCBC para iti panangpilida kadakuada kas LSV ken excitedda para kadagiti sumarsaruno nga aldaw a panagpasyarda.
Innayon met ni Carolyn Celestino manipud Manggahan, Pasig City a saanda a namnamaen a napagasatan dagitoy kas Lucky Summer Visitors kabayatan ti maika 34th anniversaryda iti asawa daytoy a ni Ricardo Celestino Jr. ita nga aldaw.
Mangnamnama daytoy nga agbalin ti umuna a panagbisitada iti siyudad ti Baguio kas memorable babaen iti tulong ti BCBC nangnangruna ket paset ti tourda ti ipapanda sadiay Strawberry Farm a kangrunaan a rantada iti panagsang-atda iti siyudad ti Baguio ken probinsya ti Benguet.
Naibinglayda pay a manipud idi bulan paylaeng iti Marso ket nagpa book dan iti pagluganan ken pagiyananda gapu ta namnamaenda ti panagsangbay dagiti adu a turista iti siyudad ita nga aldaw.//Bombo Genzel Depayso
