Umap-apela ita kadagiti addan bileg dagiti sumagmamano a residente a dumaldalyasat iti Road 2, Interior B, Barangay Balacbac, Baguio City para iti naparpartak a panakatarimaan iti kalsada sadiay.
Iti panakiuman iti Bombo Radyo kadagiti sumagmamano a residente iti nasao a lugar, impeksada a parikotda ita ti nadakamat a paset iti kalsada nangruna ket panagtutudon.
Malaksid iti dayta, maysa pay a pakaseknan dagiti residente ti nargaay a riprap wenno stonewalling iti kanal gapu iti naipatungpal a panagback-hoe a nakadalapos kadagitoy.
Impeksda pay ti panagdanagda iti posible ken kellaat a panakatnag dagiti pagtaengan ken kaykayo a lapdan koma iti nasao a riprap nangruna ita nga agtultuloy ti panagtudtudona a mangpalukneng iti daga.
Mainaig iti dayta, ti manarimaan a konstruksyon ket makaituntunda metlaeng iti panaglayos iti makinbaba a paset iti nasao a kalsada gapu iti panakaapektar iti canal rason nga awan unay pagnaan iti danum.
Innayonda nga iti baet nga inaldaw nga adda ti konstruksyon sadiay, dudua wenno taltallo laeng a trabahador ti makitkitada ken agarop uppat nga oras laeng ti busbusbusenda para iti daytoy gapu iti sasaaden iti panawen.
Gapu iti dayta, kidkiddawen dagiti residente kadagiti makinproyekto iti nasao a konstruksyon ti naparpartak a panakaileppas daytoy.//Bombo Genzel Depayso
