Pakabuklan a 1394 a kameng iti pulisya ti mangbukbukel iti agdama iti Baguio City Police Office.
Iti panakiuman iti Bombo Radyo kenni Police Colonel Ruel Tagel, City Director iti nasao nga opisina, 300 a nakaduty iti partikular a shift ti maiwarwaras on the ground wenno iti ruar malaksid pay kadagiti nadutukan para iti administratibo a trabaho.
Karaman kadagiti pakadutdutukan dagitoy ti checkpoint, fixed visibility point, chokepoint, malaksid pay iti mobile patrol ken foot patrol iti nagduduma a paset iti City of Pines.
Sigun kenni PCol. Tagel,ipangpangrunada ti napartak ken responsive a serbisyo publiko maitunos iti impaiyulog iti baro nga hepe iti Philippine National Police a ni Nicolas Deloso Torre III a 3-minute reponse time.
Innayonna a saan metten a kasapulan nga agturong iti istasyon iti pulisya dagiti agpaarayat gaputa mabalinda nga umawag iti 911 ken dagiti kapulisanen ti umasideg.
Mainaig iti dayta,dinakamat ti opisyal nga awan pay ti naawatda a prank call wenno dagiti umawag iti ang-angaw.
Gapu iti dayta, mangnamnama ti opisyal nga agtultuloy ti kooperasyon dagiti umili iti Baguio City tapno saan a mataktak wenno maperwisyo dagiti umaw-awag a pudno nga agkasapulan iti tulong.//Bombo Rob Dominguez
