BAGUIO CITY – Imbingay ni Itogon, Benguet Mayor Victorio Palangdan ti napasamak iti kaunaan a kaso ti ipupusay gapu iti COVID-19 a nailista ti munisipyo.
Sigun kenkuana, ti nasao nga indibidual ket agtawen ti 25, tubo ti Ilocos Region ken idi Enero ti agdama a tawen ket nagturong sadiay Ampucao, Itogon tapno agtrabaho iti minas.
Kinunana a kabayatan ti panagtrabaho ti nasao nga indibidual ket naaksidente daytoy iti uneg ti usok a rason ken dagus met a naitaray iti pagagasan.
Naipasidong iti swab test ti pasyente ken ditoy a nakumpirma a positibo daytoy iti COVID-19.
Innayon ti mayor a naklaat dagitoy gaputa naipadamag metten a pimmusay ti nasao a pasyente gapu iti COVID-19 ken saan a rason ti nasagrap daytoy a dunor.
Dinakamatna a naipasidongen iti cremation ti nasao a pasyente bayat a naikoordinar metten ti insidente iti pamilya daytoy. (Bombo Jordan Tablac)
