Maipagpaganetget manen iti publiko ti nasapsapa a panagparehistro dagitoy para iti umadanin a midterm elections.
Iti panakiuman ti Bombo Radyo kenni Atty. John Paul Martin, Election Officer iti Commission on Elections – Baguio, inyunay-unayna a liklikan ti panagparehistro iti maudi nga aldaw gapu ta makaitunda daytoy ti atiddog unay a pila ken inconvenience.
Iti baet dayta, kinunana a nu saan a maliklikan a sumambot iti maudi nga aldaw iti voters registration ket masapol nga agbalon ti atiddog a pasensya.
Kagiddan dayta, impetteng ni Atty. Martin a local registration laengen ti iyakomodarda iti intero a bulan ti Setyembre rason a maguyguyugoy dagiti saan nga agbotbotos iti Baguio City nga agparehistro iti register anywhere.
Malaksid iti dayta, mangrugi metten ti panangipila dagiti agngayangay kadagiti Certificate of Candidacy (COC) dagitoy inton Oktubre a uno agingga Oktubre a ocho.
Manamnama met a maipaay iti nasao nga opisina ti sample ti Automated Counting Machine (ACM) a maaramat kadagiti field offices para ti demostrasyon tapno ma-familiarize dagiti maseknan a personnel iti proseso ken panakaaramat iti nadakamat a makina.
Mainaig iti dayta, makidkiddaw iti pubiko ti panangipakaammoda kadagiti otoridad dagiti mapagdua-duaan ti identidadna nga agpangpanggep a tumaray para iti posisyon iti gobyerno.//Bombo Rob Dominguez
