Nakasagan dagiti nasurok sangagasut a Reactionary Standby Support Force (RSSF) ti Police Regional Office-Cordillera para iti posible nga augmentation dagitoy bayat ti 2024 State of the Nation Address(SONA) ni President Ferdinand Marcos Jr. inton malem.
Iti panakiuman ti Bombo Radyo kenni Police Lieutenant Colonel Carol Lacuata, ti spokesperson ti Police Regional Office-Cordillera, awan pay ti impatulodda a tropa ti pulisya manipod iti rehion para iti nasao nga aktibidad gapu ta kabaelan pay ti pwersa dagiti kameng ti pulisya iti National Capital Region wenno iti National Headquarters ti agdama a sitwasyon idiay.
Sigun kenni Colonel Lacuata, karaman kadagiti nakastandby para iti augmentation ket nagtaud iti nagduduma a Police Provincial Office, ken City Police Office.
Saan met a personal a makipaset ni Police Regional Office-Cordillera Regional Director Police Brigadier General David Peredo Jr. iti 2024 State of the Nation Address gapu ta nabilin dagitoy a bantayanda wenno agtalinaedda kadagiti masakupanda ken tapno napartak a madesisyunan nu kaspangarigan masapol ti panakaideploy dagiti Reactionary Standby Support Force.
nakasagana tayo iti total nga 166 nga warm bodies nga madeploy nu bilang a kasapulanda, agayabda ti augmentation .
Mainaig iti dayta, impasigurado ni Colonel Lacuata a nakasagana ti Baguio City Police Office a mangimanihar kadagiti tignay-protesta a posible a maangay iti siudad nga immunan a naipadamag a mapangpanggep a maipatungpal.
Malaksid iti Baguio City, awanen ti sabali pay a lugar iti rehion a manamnama a mangipatungpal iti protesta bayat ti SONA ti presidente ngem nakasagana latta dagiti kameng ti pulisya.
Kabayatanna, awan met ti naobserbaran a pangta dagiti kameng ti New People’s Army, Communist Terrorist Group ken daduma pay a makakannigid a grupo.//Bombo Rob Dominguez
