Naidestino iti sabali a lugar dagiti 1,308 manipud iti 1,586 a police officers nga addaan iti kabagyan a tumaray iti 2025 midterm elections kas maibasar iti waragawag ti Philippine National Police.
Sigun kenni PNP spokesperson Brig. Gen. Jean Fajardo, maisaruno a maiyakar dagiti nabatbati a police officers inton bigat wenno inton umay a lawas.
Inlawlawag ni Fajardo a dagitoy a police officers ket addaan iti kabagyan a kandidato iti agingga fourth degree of consanguinity wenno affinity.
Maipalagip nga idi 2023 Barangay and Sangguniang Kabataan Elections ket adda ti 2,800 a police officers a naiyakar iti dadduma a lugar.
Daytoy ket nabayagen nga ar-aramiden ti Philippine National Police tapno maipasigurado ti non-partisan ken impartiality iti umay nga eleksyon.
Mangrugi ti election period inton January 12, 2025 ken agleppas inton June 11, 2025.
