BAGUIO CITY – Inkari ti Cordillera Regional Police Office (PROCOR) a maksayan iti 45,310 pounds wenno 20,552 kilograms ti nagtitipon a timbang dagiti personnel daytoy iti innem a bulan a PNP Mission: Slim Possible.
Sigun kenni PROCOR Regional Director for Administration PCSupt.Gregorio Lim, aw-awatenda ti nasao a challenge manipud iti national headquarters ti PNP.
Inwaragawagna ti nasao a banag kagiddan ti panangiyusuatda iti daytoy iti covered court ti PROCOR sadiay La Trinidad, Benguet.
Kinunana a 286 a personnel ti regional headquarter, Benguet Police ken Baguio City Police ti naipasidong iti weighing-in process kas umuna nga addang iti panangakseptarda iti nasao a misyon.
Naamuan pay a maysa a personnel manipud iti Baguio City Police ti addaan iti kadagsen a 107.5 kgs ken daytoy ti kadagsenan kadagiti pulis iti rehion.
Paset ti Mission: Slim Possible ti PROCOR ti wellness lectures, zumba ken taebo activities tunggal Tuesday ken Thursday malaksid pay kadagiti dadduma a personal physical fitness activities ti maysa a partisipante tapnu maksayan ti timbang daytoy.
Maipalagip nga iti panagadal ti PNP ket ti Cordillera Police ti maikatlo nga addaan kaaduan nga overweight wenno obese a personnel.
