KIBUNGAN BENGUET-Naapektaran dagiti agarup 636 a mannalon manipud Kibungan, Benguet gapu paylaeng iti epekto ti El Nino Phenomenon no sadino nangatngato daytoy no idilig kadagiti naapektaran a mannalon idi napalabas a tawen.
Iti interview ti Bombo Radyo kenni Honarable Cesar Molitas, mayor ti Kibungan, Benguet, kinuna a nadadael dagiti mula dagiti mannalon partikular iti paset ti Poblacion, gapu paylaeng iti kinakurang ti danum a pagsibog kadagiti mula dagitoy.
Nagbalin a parikut kadakuada ti nabayag a saan a panagtudo isu’t gapuna a bimmaset dagiti danum a magapgapu kadagiti ubbog a nangitunda iti pannakadadael dagiti mula.
Kaaduan kadagiti nadadael a mula dagitoy ket sayote, patatas, pagay ken dadduma pay.
Gapu iti dayta, nangisubmitir met dagitoy iti report iti national government kasta met iti Department of Agriculture, tapno maipaayan dagiti apektado a mannalon ti tulong.
Iti agdama, namnamaen ni Mayor Molitas ti tulong manipud paylaeng kadagiti nadakamat nga opisina.//Bombo Rosemarie Bulsao
