BAGUIO CITY – Insubli ti lokal a gobierno ti Sadanga, Mountain Province ti nasurok P1.47 million a pondo manipud Social Amelioration Program (SAP) nga inpaay ti Department of Social Welfare and Development.
Sigun kenni DSWD-Cordillera Regional Director Leo Quintilla, insubli ti lokal a gobierno ti nasao a gatad gapu ta awanen ti mapilida a kualipikado a benepisario iti SAP.
Kinunana a nangilatang ti DSWD iti pondo para iti punitiria a 1,400 a pamilia a benepisario sadiay Sadanga ngem 1,132 laeng a benepisario ti napili a naipaayan iti tulong pinansial.
Kinuna ni Quintilla a ti Sadanga ti kaunaan a lokal a gobierno a nangisubli iti pondo a saan daytoy a naaramat iti SAP.
Maipalagip a ti Sadanga ti kakaisuna a lokal a gobierno iti Cordillera a nagkedked a mangwat iti relief packs manipud iti DSWD para ita a panawen ti krisis.
Immunan nga inlawlawag ni Mayor Gabino Ganggangan a saanda nga inawat ti relief packs gapu ta mamati daytoy nga umdas ti taraon dagiti residente ti Sadanga ken tapno maipaay dagiti nasao a tulong kadagiti mas agkasapulan.
