Nasurok sangaribo a lalaki ti nakugit ita a bakasyon dagiti ubbing babaen iti panagregget ti 16 a District Health Centers ti City Health Service Office.
Daytoy ken babaen met laeng iti kolaborasyonda kadagiti nagduduma a barangay iti siyudad.
Kabayatan ti City Hall Hour a naipatungpal itay laeng nabiit, impeksa ni Dr. Elvira Belingon, dadaulo ti Pinsao District Health Center a paset iti primary care ti circumcision program ti City Health Service Office.
Innayon ni Dr. Belingon a kaaduan kadagiti barangay ket mangipapaay iti pondo kadagiti circumcision activities nga ipatpatungpal dagiti district health centers.
Nabalakadan met dagiti lallaki a kalkalpasda a nagpakugit a surotenda dagiti aftercare instructions agraman ti panangtaginayon iti private area a nadalus, ti panangliklik dagitoy kadagiti makapabanog nga aktibidad, ken ti panangmonitor kadagiti pagilasinan ti impeksion.
Para iti panang-ikkat iti ut-ot, maisusuhestiyon a makatulong dagiti over-the-counter pain relievers.
Maipalpalagip met a liklikan pay dagitoy dagiti naalsem a taraon ken citrus fruits.
