Inlukat iti Philippine National Police(PNP) ti nationwide recruitment process para iti nasurok 6,500 a baro a kameng daytoy.
Agingga iti 5,639 a quota slots ti manamnama a maipaay kadagiti 17 a Police Regional Offices bayat a 900 met para iti National Support Units a pakairamanan iti Drug Enforcement Group (225), Headquarters Support Service (200), Explosive Ordnance Disposal and Canine Group (95), Communications and Electronics Service (85),Criminal Investigation and Detection Group (75), Anti-Kidnapping Group (75), Integrity Monitoring Enforcement Group (75), ken Special Action Force (70).
Guyguyuguyen met ni Acting Philippine National Police chief Lieutenant Geneneral Jose Melencio Nartatez Jr. dagiti service-driven a Pilipino a makipaset iti nasao nga organisasyon ken impettengna a libre ti proseso.
Sigun kenni Nartatez Jr.,panggep ti panagrekrutda nga ad-adda pay a pasayaaten ti kabaelan iti kapulisan a mangipaay iti serbisyo iti publiko.
Mainaig iti dayta, impetteng met ni Brigadier General Randulf Tuaño nangruna kadagiti aplikante a liklikanda ti agkamang kadagiti fixers ken ireportda dagiti mangidiaya kadakuada iti panangasistar para iti recruitment gapu ta sigun kenkuana ket awan ti shortcut para iti daytoy nu sadino, ti laeng lehitimo a pamay-an tapno makapaset iti organisasyon ket babaen iti official recruitment channels dagitoy.
