Pabor ka kadi kabombo nga mabitay wenno madusa iti patay dagiti tattao nga mapaneknekan a guilty iti kaso a plunder ditoy Pilipinas?
Daytoy a saludsod ket mainaig iti isaksakad a gakat ni Sen. Bato dela Rosa a mangitudtuding iti death penalty iti kaso a plunder.
Ti plunder ket nakaru a kaso ti kurapsiyon nga pakairamanan ti panagkurakut iti 50 million pesos wenno nangatngato pay a pundo.
Ti nasao a gakat ket nakapauneg iti Senate Bill number 1343 nga impila ni Dela Rosa.
Daytoy ket kagiddan ti nabara nga isyu ti maatap a kurapsion kadagiti flood control projects ti gobyerno.
Ngem daytoy ngata ti epektibo a solusyon iti nabayagen a nairamut a parikut iti kurapsiyon ditoy Pilipinas?
Iti kinapudnona, adun nga opisyal ken sigud nga opisyales ti gobyerno ti naakusaran iti kaso a plunder.
Ngem adu kadagitoy nga nababaknang ken naimpluensiya nga opisyales ti nakalapsut manipud iti ima ti linteg.
Iti sabali a bangir, adu met nga ordinaryo a tattao ti napartak a nakasuan ken nasentensiyaan gapu laeng kadagiti simple a kaso ti panagtakaw.
Kayat a sawen daytoy a dakkel ti parikut iti sistema ti hustisya ditoy pagilian.
Nasakit man nga ibaga ngem no dadduma, ti linteg ket para laeng kadagiti nakukurapay, bayat a dagiti dadakkel a tattao ket makalikliklikda iti ngipen ti linteg.
Malaksid iti daytoy, kaadduan a pulitiko ken opisyal ti gobyerno ket agkukunsabos tapno laeng protektaranda dagiti gagayyem ken kaalyadoda iti pulitika.
Isu nga no pudno met laeng nga anti-corruption dagiti agdama a mammanday linteg, suportaranda kuma ti amin a tignay para iti transparency ken panagsukimat tapno maibuksilan ti panaggastos iti pondo ti asinoman nga opisyal ti gobyerno, uray no dagiti maak-akusaran iti daytoy ket dagiti mismo nga “amo” wenno kaalyadoda iti pulitika.
Ngem nabatad a sabali ti mapaspasamak.
Mainaig iti daytoy, agingga a dagiti mismo a tattao ti mangiturturay iti padada a tattao ket imposible a marisut ti parikut iti kurapsion, aniaman a linteg ti ipasa dagitoy.//Bombo Alfred Pudsoc
