BAGUIO CITY – Natiliwen ti maibilbilang a maika-walo a Most Wanted Person iti Cordillera Region para iti maikadua a kwarter ti 2021.
Nabigbig daytoy a ni Rosario “Sario” Cayabas Agustin, 52-anyos, mannalon, sigud a driver.
Maibasar iti report ti PRO-Cordillera, natiliw ni Agustin sadiay Sugo Guinzadan, Bauko, Mountain Province idi rabii ti Lunes, Abril 19 babaen iti nagtipon a pwersa ti Baguio City Police Office, Mountain Province Police Provincial Office, RMFB1 ken PNP-SAF.
Naduktalan babaen iti nainget a panagimbestigar dagiti operatiba iti tulong dagiti sibilyan a nangipaay iti impormasyon ti kaadda ni Agustin sadiay Sugo, Guinzadan, Bauko a naglemmenganna iti 12 a tawen.
Timmulong metlaeng dagiti sigud a katrabahuan ti nasao a suspek a positibo a nangbigbig kenkuana ken nangited iti impormasyon kadagiti operatiba iti posible a naglemmenganna.
Maak-akusaran ni Agustin iti kaso a panagrames babaen iti sexual assault ken naipaulogan iti warrant of arrest babaen kenni Judge Iluminada Cabato ti Regional Trial Court, First Judicial Region, Branch 59, Baguio City.
Naiturong metten ti nasao nga indibidual iti istasyon ti pulisya sakbay ti panakaiparangna iti maseknan a korte para iti umno a disposisyon.
