BAGUIO CITY – Ngimmato bassit ti occupancy rate kadagiti nagduduma nga accommodations kas iti hotels ken inns ditoy siudad ti Baguio tunggal weekend iti baet ti agtultuloy a pakaseknan iti COVID-19.
Iti panakiyuman ti Bombo Radyo kenni Andrew Pinero, public information officer ti Hotel and Restaurant Association of Baguio, kinunana a narikna ti panagbassit dagiti turista iti siudad idi nangrugi ti panagwaras ti nasao a sakit.
Nupay kasta, kinunana nga iti panaglabas dagiti aldaw ket ngimmato bassit ti bilang dagiti turista a sumangsang-at iti siudad nangruna iti tunggal weekend manipud idi Valentine’s Day ken idi naangay ti PMA Alumni Homecoming.
Innayonna nga agdepdependar ti turismo ti Baguio iti domestic tourism wenno kadagiti lokal a turista isut gapuna a saan unay daytoy a naapektaran iti panagkaro ti COVID-19 saan a kas kadagiti beach resort iti abagatan ti pagilian a nakadependar kadagiti international tourists.
Sigun pay kenni Pinero, tapnu mapunno met dagiti accommodations ditoy siudad tunggal weekdays ket agar-aramid dagitoy iti nagduduma a wagas kas iti panangidiayada iti promo tapnu adda latta dagiti sumang-at ditoy siudad.
Naamuan nga adda dagiti accommodations a mangididiaya iti nababbaba a rate wenno diskwento tapnu uray weekdays ket adda latta ti kliyente dagitoy.
